讓人尊敬的人

有很多讓人尊敬的人, 其實都在我們身邊架!

我公司早上有位清潔的阿姐, 她會來吸塵, 洗抺等 ! 大部份阿姐都好鐘意吱吱喳喳講野, 她就比較靜既, 唔會太嘈 ! 有一次同事跟我說, 原來她在自己家附近做義工的! 我才想..."嘩,她本身都有仔女, 家住舊區舊樓, 可能本身經濟也是勉勉強強, 但竟然還有時間去做義工!" 就咁樣, 我就好尊敬佢喇!

又有一個在公司樓下抺車的, 他應該是新移民, 應該來了十多年了. 他非常勤力, 總是推住架裝滿水的車仔, 在停車場穿梭洗車. 有時他要到另一座大廈洗車, 之後又走回頭洗遲來的車輛. 有一次見他帶了一個很年輕的男仔, 他說是他的兒子, 因他太太病了, 看兒子可否幫手. 之後農曆年我都會多派一封利是, 說給他及兒子的. 讓人尊敬既係, 他都說不用給兩封, 而且好似好唔好意思, 次次都要我求佢先收咁滯 ! 我都跟他說, 好細封架JA, 收喇, 他才好勉強收下! 多謝前多謝後, 好似利是內有成千蚊咁, 攪到我仲唔好意思!

有時我坐的士, 同的士佬啱傾傾多幾句, 下車時如果散銀唔夠, 多了一兩蚊, 我都叫佢唔洗找喇~ 有一次我同的士佬講, 一蚊唔洗找喇, 佢開心得好緊要, 話我好人, 又話好開心, 笑到四萬咁口, 好似執左金幣咁, 我心想..."一蚊就開心成咁, 你真係可愛喇的士佬, HAHA！＂　咁我又好開心落車, 你話呢D人幾好呀 !

所以呢, 香港或全世界, 都有好多人, 值得我地"讀過下書"的去學習架!

伊朗

伊朗咩事???

我都唔知, 應該又係政府霸權, 人民困苦, 所以人民要反抗 !

但好勁呀 ! 我以為伊朗好落後, 但D人民都可以即時把片段放上YOUTUBE, 又上TWITTER, D消息傳得好快 ! 其實人民質素可能不太差, 以前在美國讀書都見過不少中東人, 讀書好勁 ! 又例如中國都叫落後, 但也有一班質素很高的普通人在INTERNET上把關, 發放消息 ! 佢地上網仲要咩翻過GFW (GREAT FIREWALL OF CHINA), 真是辛苦好多 ! (整咩FIREWALL 呀... 你起得越高, D NETIZEN 跳得仲高 ! 仲可以磨練佢地意志, KAKA !)

大部份香港人(包括我) 始終嘆得太耐, 唔知道出面水深火熱, 係咪要提高下水平???

我以前對中東一無所知, 但911之後在SPACE上過 NORMAN BIRD 講中東的課 ! 他是英國人, 在中東住過, 他已經70多歲, 但他是一個好猛料的人 ! 他講了很多中東的故事, 都讓我大開眼界! 呢D在香港可有可無的中東班, 真是好少人上, 哎, 中東的文化咁深遠, 那裡有很多寶藏, 相信都跟今天各國的文化息息相關 ! 中東跟中國的淵源也有幾千年, 我們真的要多多了解中東的文化, 要做好朋友 !

* 我特別鐘意佢地波斯地氈的圖案, 仲有佢地幾何建築PATTERN, 真係好靚 !

PEACE FOR IRAN

劉曉波 ~ ?

我唔識也不太關心政治, 但其實劉曉波咩事要坐11年監呢?

睇佢都好斯文, 高學歷, 就算佢想癲覆國家, 都不可能一兩下子成功 ! 驚佢咩要收監呢?

其實在內地乘的士, D的士佬成日都鬧共產黨, 又話佢地"都是騙人的", "又拆又起才能貪污", "無法無天", 我只是很間中坐的士都聽了不少, 咁即是全中國人都心照喇 ! 有時佢地罵起上來, 我都擔心"嘩...你地可唔可以咁大聲講架???" ~ 如果大家個心都在暗罵呢個政府, 或呢個系統, 咁你收一個劉生坐監, 有咩用?

就好似明知大家都唔愛對方, 但大家都唔敢出聲扮"和諧", 最後會點樣? 有人出聲講真話, 另一方就鎖起佢, 個心都淡了, 鎖唔鎖都無所謂 ! 但你鎖一個, 又有兩個, 之後十個百個, 你可以鎖起十三億人的心嗎? 一係你就改善自己, 讓大家有誠意相處下去, 一係就一拍兩散, 兩敗俱傷~ 咁又幾無聊呢? 又不是重複幾千年來的你算我我算你, 唔煩架咩?

總之, 唔啱傾就收監, 真係弱者所為 !

而且呢個方法, 今時今日真係行唔通喇~ !

(其實我都是很奇怪, 中國領導層無理由唔明呢D咁簡單既道理, 你越打壓, 反抗就越大架麻~ 點解會咁做??? 又好似COPENHAGEN D 國際頂級精英, 點解保護地球的簡單措施, 一D都傾唔出, 佢地唔驚地球會出事架咩? 咁老定??? ) 奇奇奇~ 呢個世界真係奇~

Copenhagen Climate Change Conference 2009

真係好得意架WOR, 當全世界等D地球至TOP "精英" 幫我地解決地球問題, 呢班咁精英既精英在COPENHAGEN 竟然咩都傾唔出 ! 我估佢地都是當去開下PARTY, 食下大餐, 住下六星酒店兼在鏡頭前擺下POSE就當做完份工作交差 !

我成日都覺得好奇怪, 當我地D蠢蠢地既蟻民都知道自己的生活有D唔妥, 個地球有D唔妥, 點解D精英開大會仲求其過我地D中小企開會 ! 唔通:

1. 佢地已經同外星人有聯絡, 地球熱爆時會有外星人來接佢地走?
2. 根本地球無事, 佢地假宣傳, 話有GLOBAL WARMING, 借環保賺錢 ! (我又見過不少人話地球其實是GLOBAL COOLING, 所以這數年冬天都有很多雪災! 而GLOBAL WARMING只是URBAN WARMING, 他們只用城市上升了的溫度代表全地球溫度, 所以就吹成GLOBAL WARMING ! 例如室外氣溫跌了5度, 室內暖氣又調高了3度, 我地就話好熱呀咁 !)
3. 佢地諗住殺死晒D地球人, 把地球帶回天地初開ADAM & EVE 之時, 由頭來過唔洗煩
4. 佢地已經研究左D好先進既儀器, 可以即時淨化CARBON DIOXIDE, 即時淨化海水飲用, 即時由空氣收集粒子變塊牛扒, 總之佢地有類似叮噹的百寶袋, 要變咩有咩, 無有怕!
5. 地球人根本發緊夢, 佛祖話人生是舞台呀麻, 我地依家好似MATRIX咁, 真正的身體在瞓緊覺, 我地依家在夢中行走 ! D精英知道就算地球爆炸, 都只是一個夢中地球幻滅, 所以就由佢自生自滅喇 ! (咁我地真正既身體係邊度瞓緊覺???)
6. 可能D精英其實有一個龐大既地球人撤走行動, 已經安排好我地以光速噴上火星, 只因為怕引起恐慌, 所以唔講住! 　　呢幾年佢地已經把火星暗中佈置好，D溫度同環境同地球一樣, 只是太陽會細左, 同埋應該是無月光光既 !

所以, COPENHAGEN 之旅佢地都有飛機照飛, 有名車照坐, 有扒照食, 暗示叫大家唔洗太擔心~ ! KAKAKAKA！

屋漏兼逄夜雨

香港的大裝修文化真係唔掂 ! 有朋友話D房間咁細, 唯有鐅爛D牆改裝, 所以咪個個都拆牆LOR !

好, 講我樓上兩公婆, 老公是法國人, 老婆是中國人, 佢地住頂樓! 十年前搬來, 在房間用大炮打爆個天花, 裝左條旋轉樓梯上天台 ! 天台加建了一間屋, 把原來天台的結構都改動了! 之後又在天台裝洗衣機, 洗手盤, 電視, 呢樣個樣, 把水喉電線亂拉一通!

他們也把廚房的牆拆左, 在本來凌空的晾衫位加建地板牆身, 把廚房增大! (即伸出的地板下面是空的, 是我家晾衫位置!)

當年他們大改動時, 因為嘈到好似地震, 我家跟樓上吵過! 我們跟個法國佬說, 你地咁樣僭建, 政府唔批的! 呢位BARBARIAN 話, 香港政府無鬼用, 咩都唔理, 我地鬼佬要打橫就打橫行! 裝修完之後, 我地就開始受漏水之苦喇 ! D水在天花, 牆身滲出來, 有時一滴滴, 有時好似倒水咁 ! 我地好嬲, 又去投訴樓上, 點知佢話佢仲慘, 佢家漏水漏到好似水濂洞咁, 佢條旋轉樓梯好似瀑布 !

我唔鬼理佢, 剛好當時政府開始宣傳舉報僭建, 我仲唔投訴你!

好彩, 屋宇署經過我嘈嘈嘈, 終於肯來! (初時話無即時危險, 不會立即來, 激死我!) 他們發現條旋轉樓梯同廚房的僭建都破了大廈結構牆, 必須立即還原! 佢地不服, 又吵又嘈左幾年, 好似打埋官司, 最後都屈服把天台廚房的僭建物拆去, 又把樓梯的大洞封了!

但因為之前的改動太厲害, 我們仍然間中受漏水之苦! 今年因為有多次大大小小的漏水, 我們向管理公司投訴, 終於打開了他們在樓上遮蓋了多條喉的石屎牆! 唉, 原來他們把多條加加減減的喉用石屎遮蓋住, 內面全部都是之前裝修佬留下的垃圾泥頭, 加上長年漏水積下的臭水, 臭得不得了!

那些水積得太久, 石屎負荷不了就漏到我們家, 真是氣死喇! 我們廚房的天花現又濕又裂!

總之, 如果以香港為家, 唔該先唔好亂把住宅改建, 又無common sense, 擾人不利己, 簡直是痴線! 裝修佬都要有d common sense 呀麻??? 係咪都聽主人拆, 又加建, 又鑿天花, 裝修佬點會唔知個d是結構牆??? 現在大廈內外牆有多少被大炮震裂的裂痕都唔知, d雨水又好, 爆水喉又好, 就成日在唔知邊度走入來, 真是激死呀 !

讓座

香港有好多好人架! 我真是親眼見過無數次有人讓座給老人家 !

我成日都要由紅磡上羅湖, 首站多數都有位坐! 因為有成45分鐘, 我唔想企, 都好正常麻! 我好怕中途有好老好老既老人家上車, 咁見到點都要讓座喇~ 但好多時, 我都會見到有男仔一聲不響企起身，　示意阿公阿婆坐低！　我心想，真係好喇，　我繼續坐！　HAHA！

但我也試過同爸媽坐地鐵，　都有人讓座俾佢地，　我都好感激既！

因此，我次次都同自己講，　幾累都要讓俾老人家坐，因我都想有人讓我家既老人家麻！ HEE HEE !

所以講真, 我覺得香港有好多好人, 唔係有D人講得太差WOR...

你無壓力? 你真係無壓力???

中學上中國歷史堂, 讀到日本侵華, 那位老師很好, 他特地在前一天找我, 很認真的跟我說:
"因為你的身份特殊, 你阿媽是日本人, 所以想跟你說聲, 明天我會教到日本侵華, 你不要覺得唔舒服, 這是歷史!"

老師很好人, 也是傳統很認真的人, 他特別跟我說聲, 我也很開心, 除非老師講到好似人身攻擊, 我根本都唔介意在我面前痛罵日本仔侵華, 總之, 殺人放火戰爭都是不應該的!

但之後的對話好好笑, 他順便問下我返學點樣, 功課如何等等, 我話OK喇. 之後佢又問: "你有無壓力?" 我想了一下, 話: "無呀!" 老師又問, "你無壓力?" 我話"無呀!" 佢再問: "你真係無壓力???" 我覺得好似老師要迫我講話自己有壓力, 佢先會停止再問. 我最後一次答: "無", 佢好疑慮咁樣不再追問.

其實當時我個腦在想... "壓力? 壓力係咩LEI架?" "死喇, 我都唔知壓力係咩, 咁我點答呀?"

又一次證明, 大人好鐘意用自己的想法加諸在小朋友/年輕人身上! 老師就是想我答"有", 那他才有空間發揮"指導"的角色麻, 你話"無", 反而窒住佢 ! 但本來不知壓力為何物的我, 咪俾老師灌輸左"做人無可能無壓力" 的謬論LOR ~ !

做人應該是無壓力的, 不論貧富, 都應該是開心的 !

* 當然, 我都很尊敬這位老師, 特地跟我說聲授課內容, 到今天我都好感激, 唔會忘記既!

婆婆住郵筒???

我5歲時第一次全家去日本玩, 回來香港後好勤力叫阿媽教我日文, 寫信俾在日本的婆婆!

每次把信封放入紅色的郵筒(殖民地時是紅色既), 我都好奇怪, 日本點解會在郵筒內? 如果日本在郵筒內, 咁婆婆就縮成好小好小, 都住在郵筒內???

我百思不得其解左好耐好耐~ 至有一次見到有郵差叔叔打開個郵筒把一堆信放入麻包袋, 我好震驚! 咩內面咁樣架??? 咁我封信點樣去日本架??? 我好擔心...

小朋友真係有好多心事架! 不過, 唔知係咪以前D小朋友蠢D, 我又覺得今天的小朋友唔會為呢D野擔心...有EMAIL麻, 阿爺阿婆一定在幾分鐘內回覆乖孫, 邊有時間讓小朋友擔心呢???

Han Na Chang - Haydn Cello Concerto no. 1 in C Major

韓國人HAN NA CHANG 拉CELLO 超級好聽 ! 雖然我鐘意痴線的藝術家: 梵谷,GLENN GOULD等, 但也好鐘意活潑開朗的藝術家 ! 我傾向鐘意痴線的男人, 及開朗的女仔, 可能是我現實生活的寫照 ! 我身邊的男人都有點痴線, 但我自己就比較開朗&正常!

WELL, 講番HAN NA CHANG, 佢好似已經幾出名, 但我剛剛先識佢 ! 我鐘意佢拉CELLO的輕鬆, 整個人都跳動, 加上對眼碌下碌下, 好可愛 ! 佢同樂團有交流, 感情活潑但不失細膩, 給聽眾觸電的感覺!

時代進步了, 以前GLENN GOULD 唔鐘意公開演奏, 覺得D聽眾想佢死, 想捉佢錯處, 因此在無比壓力下改為在直播室彈奏 ! 梵谷也因為自閉, 死都唔肯把自己的作品公開讓人評論, 變左窮鬼! 今天, 不那麼簡單了 ! 做一個藝術家(或者做人), 除了要真的有料, 仲要睇得玩得, 要打人際關係!

我朋友的女兒也是鋼琴天才, 4歲初學時年輕的"MISS" 驚為天人, 想把小朋友據為己有, 抬高自己身價! 但因為小朋友太出眾, "MISS"不得不承認她已不懂教導, 把小朋友放走了! 好幸運, 小朋友遇上一個醉心音樂的老師, 她讓小朋友完全發揮, 自己只是從旁點撥, 有時語氣激動地罵小朋友, 說表演/比賽, 不是鬥誰的技術好, 而是比較那一個夠大膽, 那一個夠奔放! 老師跟小朋友說, 彈奏時要同個天有溝通, 不是自顧自在彈; 開心的地方要笑, 悲傷的時候要苦, 不可以無表情! 後來, 小朋友更上一層樓, 此位老師跟我朋友說, 我可以教的都教完了, 但我只是醉心音樂的藝術家, 我沒有什麼人事關係, 如果你想你女兒向演奏方面前進, 我介紹你去另一個有名氣的老師, 他可以幫你女兒向比賽, 表演方面進發!

我聽了都好感動, 她是無私的藝術家及老師！　她跟小朋友說，　你將來有什麼成就，　都是你應得的，　跟任何人都沒有關係！ 之後, 雖然師徒感情深厚, 老師都把小朋友"趕走"了!

這小朋友現在長大了，　在國際賽事都拿了不少獎！　

因為有這樣的老師，　我有信心小朋友會繼續開心活潑, 享受音樂藝術, 順便感染其他人架!

Think Outside of the Box

我好細個時, 都有THINK OUTSIDE OF THE BOX, 有挑戰權貴的精神架 !

有一次我在家中跟細佬玩, 玩到鬼咁嘈, 我阿媽就好忙攪呢樣個樣 !

我細佬之後又話要去洗手間, 大叫阿媽來幫佢 (佢仲好矮麻~) 我阿媽又走過來服侍佢 !

我突然心血來潮, 在洗手間門前問阿媽:
"如果我係度小便阿媽你會點呀 ?"
我阿媽一手抱住細佬, 一頭擰個頭來, 好惡死話:
"我會打死你 !"

所以話, THINK OUTSIDE OF THE BOX, 跟 PEE OUTSIDE OF THE TOILET, 都不是太容易 ! D權威人士永遠都打壓我地嘗試創新既精神 ! (~.~)

圖中我地兩姊弟 PLAY INSIDE OF THE CIRCLE, 哈哈 !

老師的無聊問題

我BB班時, 因天生聰穎, 不用父母"鞭打"或"悉心教導", 都可以自動做功課考試 !

我仲記得BB班考試, 老師要一個一個豆丁B上佢個小講台的桌子旁, 給我們一張4格的圖片, 每一格問: "呢個係咩LEI架?" 然後我地用英文答 ! 我依家都記得我細細聲答: "TREE", "BOY", "GIRL", "DOG"..... 老師好開心, (因為我全對) 問我: "你好叻WOR, 邊個教你架?" 我個心好慌, ( 我是好細膽既小朋友麻~ ) 因為根本無人教我, 我唔識答, 或應該說我的詞彙有限, 唔識解釋 !

於是我唔出聲, 個心砰砰跳 ! 老師繼續死都要問: "邊個教你架?" 我又好驚, 唔知點算.... 老師又問"係咪媽咪教你架?" 我心想, 我點頭就甩難喇 ! 於是我就點頭 ! 老師話: "你好叻呀!"

依家回想, 小朋友隨意的大話, 就是大人如此無聊咩都要問, 問出來的 ! 小朋友好聰明, 知道用什麼答案大人才會滿意, 所以會投其所好, 以便自己甩難 !　　呢位老師，　問的時候都認定左是我阿媽教，　咁點解要追問呢 ? 如果我牙尖咀利, 一句無人教, 我自己識既, 老師會唔會黑臉呢?

所以, 當大人見到小朋友, 唔好一輪機關槍問D無聊野: "你好聰明呀, 你咩名呀 ? 你好肥呀, 可唔可以搣你? 幾歲呀 ? 邊個同你來架? 有無做功課呀 ? 有無乖呀聽阿媽話呀 ?" @.@ 依家呢個年代仲要一個小朋友應付十個無聊"待嫁"的姨媽姑姐, 或十個"待娶"的阿叔阿伯, D小朋友真是好慘, 早早學識投其所好, 快快甩難喇 !

髮飾舖SELL招-近時代廣場

銅鑼灣時代廣場戲院對面有一間賣髮飾的小舖頭, 內有髮夾, 橡膠圈, 髮COOL, 也有絲巾皮帶之類!

呢D舖頭香港日本都大把, 但我只見過呢間的SALES是會示範點樣用D產品既 !

那間舖頭的靚女SALES 都有一把秀髮, 當客人拿起一個髮夾猶豫之際, 佢地會好快走過來教你點用 ! 講真, 我都唔知髮夾可以左夾右夾夾咁多花款出來, 話晒我都只是貌似18歲既中女, 無D少女咁多研究 !

SALES 會即場示範, 呢個髮夾除左可以咁夾, 仲可以咁咁咁夾, 然後快速地把自己的頭髮打幾個圈, 然後夾實 ! 有時佢地又會掃起少少頭髮, 用幾個迷你夾夾幾下又攪掂, 神奇呀 ! 佢見你仲有D猶豫, 佢就會話, "不如幫你試帶呀 !" 跟住就會毫不介意你大汗細汗, 一手拿起貴客的秀髮, 捲呀捲然後一夾, 把你銀包的錢也夾去了 ! 又好難抗拒, 因為佢教你夾, 幫你夾, 俾鏡你照, 仲夾得好好睇, 而且D髮飾都幾靚, 也有免費維修/換橡筋繩 !

雖然一向唔鐘意太進取的SALES, 但呢間竟然有D例外, 奇呀奇 !

北京石景山遊樂園

有時真係覺得中國人好過癮, 你吹佢唔脹 ! (我找不到更貼切的字眼去形容 !)

當香港人又擔心未來上海廸士尼會否搶走香港廸士尼客人時, HAHA, 多餘 ! 原來北京已經有個翻版廸士尼 !

樂園全世界都有, 例如香港的海洋公園, 他們有自己的Character公仔, Logo, 賣點, 因此才特別, 吸引一班本地及海外客人 ! 但北京呢間滴滴尼, 門口竟然寫: "去廸士尼太遠喇, 來北京石景山遊樂園喇 !" 救命 ! 入到去, 內面的公仔人物全部都是面目全非的叮噹, HELLO KITTY, 米奇老鼠, 哎呀 ! 嚇死人喇 ! 仲有D "工作人員"甩頭甩髻, 成個公仔頭跌出來, D公仔比例扯亂晒, HELLO KITTY 甩鬚, 叮噹減肥變洗衫板 ! 總之, 就是翻版 !

最好笑個樂園, 一年有150萬人次(唔知真假), 樂園負責人仲理直氣壯, 話佢地無米奇, 但有大耳貓 ! 哎, 真係真係真係, 唔知嬲佢好笑佢好 !

中國人真的好奇怪, 成日自卑自己落後, 俾人蝦, 俾人歧視 ; 但當自己有錢去發揮時, 又不自重, 不肯研發自己的東西 ! 你又窮又蠢就無辨法JEH ! 北京WOR, 有多年首都的智慧, 又有錢起樂園, 又跟國際接緊軌, 點解要抄D咁國際既品牌, 要抄點解D手工唔做好D ??? 個樂園負責人應該知道自己是侵權的, 咪都唔會話佢個個係大耳貓喇 !

真是激死 !

有興趣去YOUTUBE 睇下: Beijing Dismayland Resort (拍攝的是日本電視台, 醜呀醜 !)

Ando Hiroshige 安籐廣重

Ando Hiroshige 安籐廣重 (1797-1858) 是日本著名浮世繪藝術家 !

日本在17-20世紀興起浮世繪, 製作者先用木頭雕出畫像, 再上色印刷 ! 因此同一張作品可以倒出很多COPY出來賣 ! 浮世繪UKIYOE 的意思是: 世間百象之繪圖之意; 即畫出來的對象是人生百態, 社會百像, 是平民百姓的娛樂畫作, 不是皇帝命令要畫的景象 !

因此浮世繪反映當時日本平民生活的一面, 看起來都是輕鬆愉快的 !



左圖是很有名的下雨趕橋, 廣重把大雨刻出來再印, 感覺很強勁 ! 之後VAN GOGH 驚為天人借來抄襲, 那感覺都不一樣~ ! 此圖結構很緊湊, 水平線是斜的, 彎曲的橋有張力, 上面的百姓狼狽不堪走避, 還有撐船的人都有急急腳的形態 !



此圖以高空向下望(BIRD'S EYE) 的角度畫, 斜的水平線有如雀鳥飛過轉急彎, 冷冷的望一下下面的傻佬避雨般, 笑緊下面的緊張急忙, 真是好好睇架 !

下一張就好寧靜, 百姓食完飯出街走走 SHOPPING, 下面大家都很繁忙地為生活張羅八卦, 大大的月亮就掛在上面, 默默照亮大家的心, 我都好鐘意月光光架 ! 月亮幾百年前照過江戶EDO CITY, 今天一樣照著香港, 咁多年來都開工無休, 真係要多謝月光光 ! 呢張都是半高空角度畫, 作者的視野都好廣下架 !

再睇下D細節, 當時江戶人出街帶燈籠照明, 二樓有人八卦望街, 男男女女都可以一齊逛 (當時歐洲城市的女士是不可以隨便上街), 每一個人都有月光照射的倒影, 悠悠閒閒的, 可見當時是一個非常開放自由的社會, 反而比現在拘謹嚴肅的日本人輕鬆 !

右圖也是非常有名的大浪圖, 日本跟海永遠是一對的, 海水提供歷代日本人豐富的魚獲, 養育日本民族的蛋白質及鹽分, 也提供一個穩定的天氣, 不致太寒太熱 ! 從日本人的食物 :　　魚生，紙菜，　鮮蝦，　海膽，　八爪魚，海鹽等等，　就知道日本人對海的鐘愛　！　　日本人染布都是用深淺藍色，　跟右圖的海浪顏色一樣　！ 　那就是海洋的顏色，　也可能是大魚的顏色　！

日本人愛海，如圖中驚濤駭浪中都有三條漁船溶入波浪中，　看上沒有跟大自然抗衡的感覺，　反而是隨波逐流，　跟著巨浪上上落落，　死在海洋今生無悔咁樣　！　（睇清楚，　真是有三條架！）

再再看清楚，　除了隱在大海中，三條命懸一線的漁船，遠處還有日本人最尊敬的富士山，　在默默守護著漁船　！ 　見到富士山, 畫中的位置就很清楚, 呢度是江戶(現東京)對出太平洋海面了 ! 富士人對日本人來說，　真的非常重要，　說富士山提供生命給日本人，　相信也沒有什麼人會反對吧？　高山是很有力量的，　在山群中我們感覺到，　地球是有生命的，　是不容人類肆意開山闢石的！

BASIL RIP \l/

我一生人的第2粒發芽種子上星期夭折了~ ! (第1粒是芫莤, 第2粒是BASIL)

經高人指點, 可能我在最冷的天氣 (12-16C) 淋了太多水, BASIL 幼苗發芽後上升到1CM, 就有輕微發黃, 到了1.5CM, 就腰骨無力彎低, 最後成塊葉撞落泥面, 宣告升仙了 ~

我在11月17日也有播滿天星 & 薰衣草, HAHA！　　滿天星在28日開始俾面發芽，　薰衣草就無動靜（雜草就有）今次忍住唔好淋佢，　隔兩天才SPRAY下佢, 希望今次似樣D, 生番一盆肥肥白白既花花草草出來喇 ! ;)

雞毛掃

依家好少見雞毛掃了, 它曾經是不少70-80年代小朋友聞風喪膽的刑具 !

雞毛掃曾經代表三樣野:

1.母親

2.刑具

3.環保打掃用具

雞毛掃的消失, 也代表上述三樣野的消失 !

現在已經很少見有"母親"了 ! 現在的女性, 大部份都不想要小朋友, 理由多多; 也有很多女性想要但無法懷孕. 這又要跟工作壓力, 生活習慣, 化學飲食, 空氣污染拉上關係 ! 現在的女性都很獨立, 很難完全不工作只做母親 ! 家務不是由外傭負責就是鐘點; 有小朋友的也會交給老父母照顧 ! 我們小時候母親手執雞毛掃, 在家中坐鎮呼喝打點的光景, 也消失了 !

用雞毛掃打仔更不用說, 簡直是不可能 ! 不是好心的鄰居會代為報警, 就是懂事的小孩自己打999, 告發阿媽虐待 ! 母親至高無上的權威沒了, 改由政府代之 !

雞毛+竹, 代表那時代(只是20多年前) 的產品仍可以就地取材 ! 把自家的雞毛拔下, 縛上竹支上, 就可以打掃兼打仔了, 是多功能的環保產品 ! 到了今天, 聞雞色變, 飼養雞隻都多多麻煩, 一不小心惹上雞流, 說不定家中的雞毛掃都要被政府拿去化驗, 驗虫驗菌驗毒, 總之, 今天好像什麼事都是大件事 !

雞毛掃完成了其歷史任務, 消毒後可以放入博物館喇 ! ;)

初次種BASIL ~ ;)

10月31日在泥內放了骨粉, 等了一星期, 11月7日播了BASIL 種子.

先把約1MM 的小種子播在泥土表面上, 再用幼泥輕輕覆蓋. 11月14日因天氣轉涼, 用了透明膠袋覆蓋在小盤上, 膠袋開了3個大孔透氣. 這樣除了保暖也可以保濕.

每天噴水一次保持濕潤, BASIL喜溫暖濕潤的環境.

11月15日晚上看見有綠色一點, 11月16日早上很明顯是幼苗出來了.

左圖是11月16日晚上拍攝, 左面一點綠就是了, 依家有6MM高~ 唔知其他D種子發唔發芽呢? 希望多幾棵幼苗喇~ ! 好緊張呀!

中國歷代大屠殺!

我阿媽係日本人, 所以我在小學時已經有很多同學仔問我一D好高深既問題:
"你鐘唔鐘意日本天皇?"
"我阿媽話日本人係衰人, 你覺得呢?"
"D人話日本人打中國人, 所以我唔知應唔應該鐘意你~"
"D人話日本人好殘忍, 有南京大屠殺, 你知唔知架??"

童言無忌, 大家都唔知大家講咩, 都是聽D "人"講, 所以這些問題完全沒有影響我結交小朋友, 事實上很多小朋友都好鐘意我 ~ 但這些問題, 產生了我對戰爭, 文化, 歷史, 人性的興趣.

最近在書上看到關於中國歷代大屠殺的文章, 嘩.... 才知道原來是咁恐怖 ! 幾千年來, 奴隸被虐待勞役至死是理所當然, 如果碰上個咩咩戰役, 咩咩之亂, 咩咩軍閥打鬥, 原來人口會急降90%以上 ! 我初初想, 點樣死咁多人呀, 原來是這樣的: 當一個地方的人口因戰亂死去20-30%, 餘下的都會因走難, 飢餓, 瘟疫而死 ! 因此直接死於戰亂的可能只有30%, 但餘下60%是間接死亡的. 而大部份戰役, 都會屠城, 有些極度殘忍的, 我都唔敢寫出來 ~ 因為軍隊人數有數十萬, 要提供他們足夠的糧食非常破費, 因此很多時候軍隊要去到邊食到邊, 而最好的食物就是屠城後的百姓喇 ! 有些時代有大型人肉攪碎機, 連人帶骨丟入去, 變左人肉免治就食, 而飲料就是人血 ! 戰馬也是食呢D, 因此軍隊跟戰馬嗅到血都要發狂 ! 真係好恐怖 !

其他殺人方法咩都有, 人肉皮包菜, 生吞活剥, 對女性凌辱變態殘殺, (對男性一樣可以變態殘殺)~ 甚至對懷孕肚內BB都會剖出來拋弄殘殺再吃掉 ! 其他有堆積如山的耳朵, 腳掌, 手掌, 男女性器官.... 總之, 雖然以前都有聽說過, 但再活生生的要我想像呢D事, 都真是非常恐怖 ! 也讓我覺得自己真是幸福死 !

但神奇的是, 人口就算急降90%以上, 反彈都非常快 ! 有說赤壁之戰之後, 大片大地只剩數十戶人, 有如天地初開, ADAM & EVE ~ 人口可以由數千萬急降至數萬, 再在百年間由數萬急升至數千萬, 生命力真是不能小看 ! 中國大地在數千年間, 人口上上落落, 又被眾多外族入侵: 匈奴, 突厥, 蒙古, 滿洲, 鬼佬, 日本人, 但人口都有今天的13億, 其生命力非常強勁 ! 我也很想知道, 所謂的中國人, 其實是漢人嗎? 那香港人算否漢人? 或是南蠻 ? 土生的廣東人是否外族?? 中國北方人明顯白淨高大臉圓, 南方人明顯黑瘦矮小, 其實我們都已經混種混得好亂, 最好查下DNA, 究竟自己身上流緊咩血 !

在大大大宇宙內看, 屠殺是人口自然的控制, 就像種花一樣, 數十粒種子往往只有十粒發芽, 可以養大的可能只有數粒 ! 弱的苗, 雜的草, 我們都會連根拔起 ! 在古代, 強者越強, 弱者死去; 而現代社會, 弱到死下死下都要返工~ ! @_@"

呢D歷史, 讓我明白了小朋友是聰明的, 小朋友不會因為呢D事憎恨別人, 小朋友會慳番啖氣, 有得玩就一齊玩 !

香港電視劇的字幕

這幾年發覺香港劇集的字幕, 越寫越好, 但好可能是久住香港的內地人寫的 !

現在的字幕, 少了很多廣東話, 而且通俗或加入了廣式英語的對白, 都會附加註明 !

例如:
對白- 你條友唔好吹水WOR！
字幕- 你小子不要吹水 (吹牛)!

對白- 呢個CASE 你PASS 俾我跟喇 !
字幕- 這個CASE(案件)你PASS(讓)給我跟進吧!

如果我唔識廣東話, 呢D字幕不但可以幫我睇劇集, 仲可以學埋廣東話, 所以我覺得D字幕是認識香港文化的內地人寫的~ 唔知係咪呢???

如果係的話, 香港人是否又少了一個工種呢?

Lucio Fontana - Italian Artist

Lucio Fontana (1899 - 1968) 是出生於阿根廷的意大利人 !

我又很喜愛他的作品 !

他最出名是他的小孔及刀痕, 他說他畢生的發現就是小孔, HAHA !

他用刀片在上了單色的畫布上一劃, 有如行為藝術 ! 那感覺要快而準, 膽大心細 ~ 那數條刀痕好像很簡單, 但難就是在那簡單 ! 這紅色畫布上的五條刀痕, 有節奏, 有結構, 刀痕反映出藝術家那一剎那的情緒, 是狠勁, 是猶豫, 是爽快, 是緊張 ?


跟運動一樣, 在那一剎那, 稍有猶豫/緊張, 都可能會由高低桿掉下來, 由跳水台跌落水, 那內心的寧靜, 只有運動家自己修煉, 根本技術多好都沒有用 ! 藝術家也是一樣, 那內心的寧靜, 真誠的心, 只有他自己修回來, 再反映在作品上 ! 有眼光欣賞藝術的人, 也是很有福氣架 !















右圖的就是FONTANA 用刀一劃的那一剎那, 雖然看似簡單, 但仍是需要勇氣的 !


左圖是開孔作, 看上簡單, 卻給人很多聯想, 整體感覺很美麗優雅~ 幾好幾好 !

我覺得FONTANA本身都頗有修為, 他的作品都很簡單, 也看不出他硬用一些什麼破格的東西去讓自己出名~ 有很多所謂藝術家, 都喜歡胡亂用一些突出, 甚至變態的東西/行為去硬稱藝術, 真是不知所謂呀 !

I Love Bach, and Glenn Gould !

巴哈的作品是我最鐘愛的古典音樂 !

小時候有學琴, 惜資質有限, 怎也彈不出像樣的樂曲 ! 唯獨是巴哈, 不管多麼難練, 怎樣錯漏百出, 我都慢慢地去練習, 就為了聽一聽那旋律！　以前沒有那麼多CD, 要聽就只好自己彈出來了! ;)

巴哈的旋律，　總是左右手交錯重複，　一個接一個，　一個上一個落，　很有層次　！　我長大後才知道巴哈的音樂被譽為天堂的音樂，　我都覺得沒有錯　！　我最愛聽 Glenn Gould 彈奏的巴哈鋼琴，　他彈奏出來的每一個音符都充滿生命，　每一根手指的節奏都幾乎完美，　真是非常＂正＂！

Glenn Gould 那神經質的性格, 完美地反映出巴哈的美; 他在鏡頭前練習時, 一時溫柔地掃著琴鍵, 一時發狂般咬著整個鋼琴彈奏, 到什麼地方他不滿意或有什麼新發現, 他會整個跳起, 口內不停狂唱著他要追求的某個音韻, 跟一個瘋漢沒什麼分別 ! 他私生活很可憐, 在今天來說, 他屬自閉, 抑鬱, 他整個人都是音樂, 容不下其他東西 ! 他無法有正常交際, 什至不敢跟其他人有身體接觸, 每天都穿上厚厚的大衣及手襪遮蓋自己 !

他很討厭演奏, 他認為那是表演給人們看, 而看他的人都不懷好意 ! 有一次他覺得狀態不好, 臨時不肯演奏, 讓主辦單位非常頭痛 ! 但GLENN GOULD 認為, 如果要聽眾花錢來聽他認為不合格的鋼琴, 那是騙財 ! 因此他寧願被罵也不肯出場 ! 唔該D偶像"ARTIST" 學下野喇, 走音就唔好唱喇, 也不要叫自己做"ARTIST" 啦, 聽到都毛管棟 !

Glenn Gould 後來在直播室找到自己的天地, 在那裡他可以演奏給廣大聽眾, 又沒有被人盯著的壓力 ! 當時正值六七十年代, 收音機剛剛流行, 相信有不少人陶醉在他的旋律~ !

1982年 他因長期服用藥物, 引致中風等疾病, 離開了地球, 留下了音色 !

接種疫苗前三思 Think before getting a Vaccine Shot !

疫苗是近代先進社會實行的防疫措施, 但鋪天地蓋的宣傳廣告, 是這幾年才有 !

這些宣傳實在太離譜了 - 肺炎咩球菌, 子宮頸癌疫苗 (???痴線, 癌又不是病毒), 流感針, 免費為6星期-6歲兒童打針, 免費長者針, 是否有點K型???

"現代人" 一生要打多少針 ? -- 白喉, 天花, 麻疹, 小兒痲痺, 咩咩菌, 咩咩癌, 每一次流行的感冒病毒(SARS, H5N1, H1N1, 雞流, 豬流, 瘋牛), 想問一下, 一個健康的孩子, 如果30歲前打這麼多病毒入體內, 會有什麼後果??

請所有無知的消費者, 在被廣告催眠左要去打咩咩針之前, 問自己 :

1. 疫苗是用什麼生產的? (上網查下喇, 包嚇破膽)
2. 直接把疫苗打入血管, 跳了口腔 & 喉嚨第一個把關, 對身體會做成什麼影響 ?
3. 打疫苗當天, 你本身有否輕微什至嚴重感冒? 如果你本身潛伏了病毒A, 但你打了病毒B入血管, 不知道你身體會有什麼反應呢? 真是 GOD BLESS YOU 喇 ! 我有位朋友, 只有28歲, 因工作時間太長身體較弱, 他打了流感針, 之後就不停咳嗽, 全身骨痛, 有一天在巴士急停時扭傷了背部, 之後背部肌肉受損, 又變了坐骨神經痛, 前後只有幾個月 ! 他後來都認為是打了流感針, 弄至病毒入了肌肉, 以至這麼容易受傷 !
4. 為什麼總是要"免費" 捐助窮國兒童打疫苗 ? 有咁好死??
5. 為什麼現在的兒童身體這麼虛弱 ? 有哮喘敏感差不多是正常, 另有大量過度活躍及自閉兒童 ! 以前唔聽D同學仔有哮喘架WOR！
6. 雞豬牛也打了疫苗, 荷爾蒙針, 激素; on top of it, 我們又打, 真是非常恐怖 ! 食物都夠毒了, 還要再打疫苗入血管?? 真係有病 !

現在上網太方便, 請看完那些賣疫苗賣到好似賣糖的廣告後, 上網再查一查, 先再決定吧 !

怕生怕死的人又會驚, 唔打又死打又死, 點算? 點呀 ! 早睡早起, 養成心境快樂, 不要過份為錢拚命, 也不要過份心散 ! 有幾多, 食幾多, 適當清潔環境, 不要斤斤計較, 有小病就睡覺 ! 咁就唔會打個噴嚏就死喇 ! 如果要死, 就勇敢D去死, 也不要打疫苗, 攪到唔生唔死, 身體虛弱 !

所有流行病毒，　都會在一段時間後失去殺傷力　！　猛如歐洲的黑死病 Black Death, 不也消失了　？！　　其實當時的黑死病，　是東方的船隻在威尼斯停泊時，　東方的病毒跟歐洲的結合了，　變成一種歐洲未見過的病毒，　因此這麼兇猛　！　　當此病毒流行起來，　歐洲人身上就會染上此病毒，　弱者死去，　強者就會在體內跟此新病毒死過　！　身體打嬴了，　就會有抗體，　即有對此新病毒的抵抗力　！　越多人打嬴，　此新病毒就越弱，　最後就不再活躍了！　　因此，　經過多年歐洲人適應了此＂新＂病毒，　病毒就不再兇猛了　！

總之, 見到D白痴廣告就幾把火 !

Arnold Bocklin - Swiss Artist

Arnold Bocklin (1827 - 1901)在瑞士出生, 他的作品都帶有一種跟死亡擦身的神秘, 很有震攝力!

一般我不太喜歡陰陰暗暗的東西, 但Arnold Bocklin 有D例外, 他的作品有種把觀者吸入另一個世界的力量, 如果太專心欣賞他的作品, 有時會覺得有點恐怖 ! 剛巧鬼佬萬勝節又到了, 不妨看多幾眼 ~ ;)

左圖是The Isle of the Dead, 此作品放大看, 真有種被勾魂的感覺, 好像有什麼東西把自己的心勾起, 可能是Grim Reaper 死神要把我們引入他的死亡島 ~~~ 划船的少女好像完全不知道自己被白衣使者引入一個異度空間 ~ 好恐怖 ~ !

右圖是 Sacred Wood, 晴朗的天氣, 卻幽幽的飄來白衣使者, 真的幾恐怖 ~ 不知道他們在拜那一個亡魂~ 想像自己在歐洲幽暗的樹林走著, 碰上這些白衣人, 真的會嚇破膽 ! 歐洲的歷史都是由戰爭瘟疫, 及扭曲了的宗教統治下磨難而成, 　畫家們的陰暗死亡feel 也不難明白 !

右圖是 Ruins in a Moonlit Landscape : 棄置的廢墟, 是戰爭? 飢荒 ? 瘟疫 ? 月亮把污損的白牆照亮, 靜靜地座落在破落的林間~ 但再看清楚.... 月亮照不到的右下角, 還有一個寂寞的旅客獨自趕騎, 他似乎無閒看看光亮的白牆, 怱怱而過 ~~ 不知是趕時間, 或心想"此地不宜久留"... ?

Arnold 哥雖然畫風都跟死亡, 陰暗, 神話等有關, 但其個人生活卻不錯, 好像都有點收入, 足夠養活一家人起居的 !

http://www.arnoldbocklin.com/ - 這裡有更多圖片, 夠驚驚用 !

Emily Kame Kngwarreye - Australian Aboriginal Artist

Emily Kame Kngwarreye 是澳洲土著, 80多歲才第一次接觸油畫畫布, 但才華畢露 ! 她本來都是畫畫的, 她用傳統的植物顏料畫在石頭, 木頭, 或人體上 ! 當地土著Aboriginal 由古至今都住在澳洲中部沙漠地帶, 但當英國人來到澳洲時, 就把他們趕盡殺絕 ! 他們現在受澳洲政府多種政策保護, 但這些政策其實也算是歧視的一種. 很多遷出澳洲悉尼市區的土著後代, 聽聞都仍頗受歧視.

但土著天生的藝術感, 沒受到現代社會的污染. Emily 的畫作純真直接, 顏色豐富, 結構緊湊, 也很有大自然的花草香, 及沙漠熱烘烘的感覺架 !
上圖是EMILY 懷念故鄉的情懷, 色彩柔和細膩.

右圖是草, 下圖是砂粒, 最下圖只是線條, 都手起刀落, 每一筆都那麼肯定, 完全看不出是一個阿婆畫的 !

城市內的人以為自己開放前衛, 但其實很受世俗影響, 以為阿婆老左就退化, 要年輕人照顧 ! 其實什麼年紀都可以完全發揮所長, 自己開心, 欣賞的人HAPPY !

看右圖縱橫交錯的白線, 複雜中條理分明, 有動感, 有氣勢, 真是非常佩服呀 !

尾形光琳

小時候我家有本尾形光琳畫集, 最喜歡此雷神及風神的畫像, 多次問母親風雲內是否真的有兩個惡人在攪風攪雨.



尾形光琳生於京都 (1658~1716) 和服布料商, 屬富家子弟. 日本傳統的和服, 都是高價藝術品, 用料上乘, 是富戶財產. 尾形光琳在藝術及手工技術走在時代尖端的家庭長大, 品味眼角相當高 ! 左圖的風神雷神, 是一幅屏風, 是日本國寶級藝術 !



他三十歲時, 父親去世, 繼承了巨大財富, 但因生性享樂, 又沒有打理生意, 十年就把財富揮霍掉了 !





他是典形的二世祖, 把家財耗盡, 但另一方面, 他不受世俗約束, 把自己一生的品味盡情地投放在藝術品上 ! 他用最上乘的材料, 結合他最直率的才華品味, 留給我們可以一再回味的手工畫作 !


如果要做二世祖, 也要做個有高級品味的呀 ! 現代的二世祖, 可能買有品味的東西很叻, 但請他創作一些他自家的藝術品, 可能茫無頭緒, 那才是真正把金錢浪費掉了 !


左圖是燕子花屏風, 構圖顏色大膽奔放, 不受時代的約束 !

真正的藝術家, 千萬不可以有金錢概念 ! 只要想一想說 : 這用料太貴了, 這賣不出好價錢, 現在不流行這些, 就失去了原創性 ! 也聽說過有位珠寶設計師, 會因為對自己的設計不滿意, 把鑽石都丟進垃圾桶內, 從新再來 ! 反而要下屬勸說不要太浪費 !

但藝術家就是不能受約束, 因此都會為家人帶來痛苦, 因此, 要做一個自由的人, 真的不太容易架 ! 希望找到一條多方面都可以兼顧的方法, 人有了溫飽, 就要提高對心靈的要求, 只接受有品味的東西, 其他都不要 ! 反而, 這樣會少了很多浪費 !

右圖是尾形光琳畫的八橋螺鈿硯箱, 上面的燕子花是用貝殼製造, 非常精美, 賞心悅目呀 !

我真是幾鐘意呢位藝術家 ~ 夠膽大夠串 ! :>:>

加工食品

書上看到一些有關加工食物的製作, 覺得頗有道理.

做生意都是為賺錢, 要有效率, 要降低成本, 都很合理. 但食品行業關係到每一個客人每天的進食, 製造商就不能只以賺錢為先.

書上說到加工食品, 例如水餃, 內含的肉類, 都是在屠宰場剩下的廢肉料打碎製成 ! 因為成本低, 又"環保" ! 剩下的肉料是一般人不吃的內臟, 淋巴腺體, 或脂肪等 ! 這些部位都儲存了肉類本身的毒素, 因此我們很聰明地避開, 誰知都走進水餃菜肉餃內了 !

在屠宰場的立場, 這些廢料與其丟棄, 不如低價賣給食品製造工廠, 不是也很合理嗎 ?

還有我們最愛的連鎖店漢堡包, 一直都遭到投訴, 說肉類不知含了什麼. 也聽說過一個漢堡包的肉塊, 是用來自全球幾十個地區不同種類的牛肉打碎製成, 因此有什麼問題都無法追蹤, 想想下都幾恐怖架 !

所有味道濃郁的加工食物, 都是用不太新鮮, 次等肉類, 過期的剩料, 加入防腐劑及化學調味料, 色素等製成, 因此, 少吃為妙了 !

*當然不可以說所有食物加工都亂來, 但相信離事實都不會太遠了 *_*"

Bach Flower Remedies 花療治情緒

如果有輕微的情緒問題, Bach Remedies 絕對可以幫忙 !

http://www.bachcentre.com/centre/remedies.htm

上述網站可以查到相關的情緒問題, 可以用那一種花療治療. 情緒問題可以是自私, 憤怒, 嫉妒, 自卑, 內疚, 傷心, 悲觀, 親人離世, 緊張, 疲倦, 恐懼, 自毀, 亢奮, 甚至說話太多. 如果有治療師幫忙找出深層情緒, 對症下藥, 效果更佳. 沒有的話, 就要自己看上述網站, 自己坦白問自己有什麼放不開的情緒, 再選擇適合的花療.

情緒可以有多種, 花療可以同時用3-4種, 不會有問題.

選擇了錯誤的花療, 也不會有副作用, 這些都是植物提煉出來的.

中環SOHO, 蘭桂芳附近有些專賣有機產品的舖頭, 都有售賣 Bach Remedies.

此網站也可以購買 - http://www.naturallythinking.com/

有一位長年工作過度的女士, 因為太緊張, 嘗試服用此花療. 她服用第一次, 晚上就倒頭大睡, 第二天完全無法起牀, 甚至打電話向公司告假也無辦法. 她熟睡了整天才醒過來, 發覺自己精神煥發, 之前的緊張不安大為放鬆. 她才知道自己根本是太勞累, 長期睡不安寧, 因此身體情緒都不妥. 服用了花療一天, 療效迫她完全放鬆熟睡, 之後身心很快就大為改善. 故花療成效是非常快的.

我自己也是因為工作時間太長太緊張, 到傍晚就非常疲倦, 我服用了OLIVE, 也是跟之前的女士一樣, 有兩星期都非常疲倦, 不停睡覺, 之後就整個人都精神起來, 工作到晚上也沒有這麼疲倦了.

可見現代人的精神太緊張, 很多時可能只是睡眠不足, 或睡得不夠熟, 引至惡性循環. 只要稍加幫助, 身心就可以Refresh, 不妨一試 ! :>:>

為何中國醫術注重養生?

中國文化醫術一向注重養生, 原因很簡單 !

香港人早幾年都看過韓劇大長今, 古代醫術高明的醫生, 不少都會被皇宮徵召, 在內當名太醫 ! 表面當然風光, 但伴君如伴虎, 每天都提心吊膽, 希望皇親國戚千萬不要得什麼病 ! 那怕是輕微腸胃不適, 頭痛, 腰酸背痛, 太醫都可能會招來全家上下殺身之禍, 都好恐怖架 !

於是, 名太醫日夜鑽研的, 都是日常保健養生 ! 皇親國戚千萬不可以有勞損, 每天的餐飲除了要豐富, 也要平衡, 皇帝吃多了肚痛, 他只怪御廚太醫, 心情不好下殺頭之罪, 就太慘了 !

因此, 中國醫術除了醫治, 養生都是一大學問, 這方面西方的醫生, 就落後很多了 ! :p

中山白石

母親的祖父, 在十九世紀末由中山白石以買辦身份遠赴日本神戶定居 ! 母親總是從上一代聽說自己的祖先是從中山白石來的 ! 但在日本住了幾代, 都沒有什麼意欲深究中山白石在那裡 !

但, 最近因為舅父去逝, 母親及日本的親戚都突然想回鄉尋根 !

感謝現代的互聯網, 很快就查到, 中山白石其實在現今的珠海市 ! 從前是沒有珠海市的, 都是統稱為香山, 後來叫中山 ! 而最接近澳門的地方, 就另外改名為珠海市, 由中山分了出來 !

我們回鄉, 就應該去珠海市 ! 而白石村, 已經因為現代發展而完全拆去了 ! 白石村是現今珠海市前山, 圓明新園的地方, 背山面澳門, 從前應該是耕地, 及有少量礦場之類 ! 母親原本姓鮑, 跟香港特首夫人是遠親 ! 夫人的先祖原來也是祖藉白石村的 !

我們乘的士遊覽珠海, 由九洲港情侶路北上, 見到珠海漁女像, 風景美麗怡人, 然後的士轉向西, 在市內行走 ! 馬路闊大清潔, 我們睜大眼看會否看見什麼跟白石有關的線索, 就給我們見到有一條叫"白石路", 也有什麼"白石委員會" ! 那裡已改建成現代的樓房, 什麼耕地的痕跡也沒有, 但幻想一下先祖曾從這裡走往一水之隔的澳門, 再乘船往日本神戶, 也很浪漫呀 !

從前沒有飛機電話, 一去多數都不返, 不知是否一直都有跟家人有書信往來 ? 也聽說當時白石村有一段時間是有相當多人去了日本留學或打工, 之後賺錢回村鋪地建圍牆的 !

珠海非常寧靜秀麗, 值得一去看看 !
















上圖是石景山公園內
















上圖是情侶路, 有很多椰樹, 海水是珠江口

涼茶不可當水喝

香港有很多涼茶舖, 天氣大熱時走進去喝一杯, 未嘗是涼快超爽 !

但涼茶是有藥性的, 一般人不知藥性, 每天都喝兩三杯, 就很容易出事 !

涼茶, 西瓜, 冬瓜, 都是出名的消暑食品, 但這些食品都非常寒涼, 寒涼就恰好用來消暑, 平衡身體狀態.

但身處香港, 有很多人由家中出門上班, 到去逛街看戲, 到回家睡覺, 都是在涼快(甚至寒冷)的空調中 ! 因此, 部份香港人在炎夏, 都不會汗流浹背 ! 這些傳統的消暑寒涼食品, 是從前每天從事室外勞動, 例如農民吃的 ! 西瓜冬瓜農民固然懂吃, 涼茶是從前的中醫為了配合當時一般大眾, 也即是農民的夏天身體情況配搭出來的茶水 ! 嚴格來說, 農民的身體也不是每一個都一樣, 只是為了大家方便, 這些有藥性的消暑涼茶也就成了炎夏飲品 !

如果身處香港, 又不是從事室外體力勞動, 千萬不要天天喝涼茶 ! 如果本身身體虛寒, 怕冷, 長期在冷氣房, 長期沒有體力勞動, 有頭痛感冒, 失眠, 疲勞, 頭暈, 更千萬不要喝呀 !

* 涼茶畢竟有藥性, 理應由有經驗的中醫, 按身體當時情況配製, 最為安全
* 同樣道理, 西方的香草, 也不可以亂食, 因為也是有藥性的

香港住屋設計 - 唔掂 !

香港住屋設計 - 真係好唔掂 !

香港人搬屋裝修率之高, 一定是世界最高 ! 從不聽其他國家的家庭, 可以兩三年搬一次屋, 兩三年一次大型裝修 ! 香港人的裝修往往又是把所有牆拆掉, 地板剷走, 什麼都丟棄, 重新設計 !

香港有這麼多人喜歡重新設計住所, 又擅於裝修，理應不難培養些優秀住屋設計師. 但為何香港的樓宇, 都這麼千篇一律, 這麼難看？　香港沒有設計師的嗎？　或設計師都要先以每呎賣出多少錢為優先考慮　？　這麼難看的樓宇都叫豪宅，　還要在工廠區，　還竟然要過千萬，　還竟然有人買，　真不知是品味有問題，　或是錢太多，　或是沒有選擇了。

香港的住屋，　無可避免要向上空發展，　但都可以有活潑的外觀，　讓每層高樓都有個性。

下列是我想要有，　但在香港都找不到或不多的：
1.很大的露台，　可以容下５個人坐下，　種點植物，　放些工具，　都不覺擠的
2.最少１００平方呎的房間，　不是放了一張牀就走不動的房間
3.活動廚房，可以跟飯廳打通，又可以隔開
4.有小玄關
5.有地方放洗衣機，　及有晾曬工作平台 . 不要那些幾條線拉呀拉, 把衣服拉出去對面廚房的晾曬架 !
6.要窄狹的窗台，　不要放得下電視機的窗台
7.樓底高
8.既然香港人都喜歡拆牆，　那新屋的房間都不要預先隔開，　改由買家自己決定；　而新屋已有的其他牆均不可以拆，　如此裝修工人有工作，　其他住客又不受拆牆噪音騷擾
9.住頂層的有私家樓梯上天台, 天台有活動平台, 可以燒烤, 可以做花園
10. 樓宇不一定要正正方方, 或H形的吧? 可以按地勢起一些呈三角形, 圓形等的樓宇. 這方面香港有很多舊樓, 設計都非常出色實用有個性.
11. 大陽能發電 --- 用電很少的電腦, 電視, LED燈泡, 風扇, 都應該適用, 每戶外牆都可以裝上太陽能板
12. 樓宇公眾地方及升降機的燈光有感應, 有人經過亮起, 沒有人時調暗

上述我想要的, 600平方呎都可以應用, 其他國家的 apartment 都是小小的, 但很實用, 很有個性, 設計很出色 !

如果上述都有了, 香港人可以減少把樓房大肆改動. 如此不但減少噪音, 而且樓宇不會因為受拆牆震鑿而出現裂痕, 形成漏水等後遺症 !

香港人對住屋設計的興趣這麼濃厚, 請給多些機會讓這些人參與設計樓宇, 減少住戶動輒改動, 破壞樓宇結構 ! 很想見到一楝又一楝有藝術性的住宅大廈, 陸續在香港出現 ! 那真賞心悅目呀 !

* 大廈的名字請改好點, 不要600呎的叫什麼軒什麼閣, 800呎的叫什麼豪園華庭, 1000呎的叫什麼壹號貳號, 海邊的叫什麼灣畔海濱, 山腳叫半山, 半山叫山頂, 山頂叫天堂, 真的快頂唔順了 !

餓其筋骨有咩用?

中國人都聽說過"餓其筋骨", 　其實背後很有道理！

飢餓讓人想到貧窮，　但也有很多人從來不肚餓，　因為口中總是不停地在吃：早午晚飯，宵夜，甜品，零食，汽水，　總是停不下來。

其實有飢餓感，對身體非常重要。　中醫叫飢餓感作胃氣，　＂有胃氣則生，無胃氣則死＂。　如果老人家或病人說什麼都不想吃了，　家人都會很緊張，　因為只要失去了肚餓的感覺，　身體就會死亡。

當身體感到肚子餓的時間，　人體內的吞噬細胞，　也會覺得肚餓。　我們都有一個經驗，　就是當錯過了吃飯時間太久, 本來很餓的會突然開始不太肚餓了. 這是因為吞噬細胞很餓, 開始吃體內的廢物. 吞噬細胞吃了一段時間, 就會飽了, 因此身體也會放出飽的訊號.

短時間的肚餓, 可以讓吞噬細胞吃掉體內已死的廢物 ! 但如果長時間不吃, 吞噬細胞就會連新鮮的細胞都吃掉, 身體就會皮黃骨瘦, 最後死亡.

因此, 有很多宗教都有齋戒, 主張一段時間少吃或不吃某些食物, 其實都有根據.

現代人癡肥, 就是因為失去了飢餓感, 任何時候有點餓就大吃零食汽水 ; 吞噬細胞長期處於飽飽的狀態, 就不會出動吃體內的廢物了. 廢物日積月累, 身體就膨脹, 身體太多廢物, 就更加沒有氣力把廢物排出, 形成惡性循環了. 零食汽水最多的美國, 癡肥也最多, 以我的經驗, 美國人其實並不吃很多, 而且總說自己不太肚餓, 不吃午飯. 吃這麼少都這麼肥, 就是因為失去了飢餓感, 吞噬細胞都收工了.

因此, 肚餓的時間, 一妨等一等, 忍一忍, 餓一下筋骨才吃, 讓吞噬細胞先幫身體清理一下吧!

* 身體在清理廢物時, 會很口渴, 那就喝多點清水幫助排出體外 :>:>

果汁保健康

飲牛肉湯(前一篇)可以吸收動物蛋白質, 但因為要用小火煲12小時, 牛肉的維生素都會消毀.

為了補充大量維生素, 必須吃大量蔬菜及水果.

但每一個人很難每一天都吃大量蔬果, 而且老人家吃太多蔬菜可能會肚子不舒服. (纖維太多, 無法消化) 因此, 把水果榨果汁, 每天喝2-3杯, 不但容吸收, 而且當中其實吃了幾個水果 ! 一天可能吃不下兩個橙, 但橙汁即可能可以飲3-4個.

如果每天都飲2-3杯果汁, 就不用吃太多蔬菜 ; 那麼同時有維生素, 及少量纖維 ; 如此不用擔心老人家或小孩難以吸收, 引致肚子不舒服.

水果中, 以蘋果藥性最溫和, 因此蘋果汁可以每天飲用.

咳嗽時不可以飲橙汁, 否則會加重病情; 另外芒果, 荔枝, 都因為藥性較強, 只宜時令時少量飲食.

牛肉湯保健康

最近在一本中醫書上得知一個簡單保健法, 就是喝牛肉湯, 我全家試後都覺得精神了很多, 皮膚都好D ! 下列是製作方法 :

1. 一斤瘦牛肉, 或 一斤牛筋, 切粒
2. 兩公升水
3. 用小火煲12小時 (是12小時, 沒寫錯)
4. 每天喝兩碗 (可以先喝一碗, 看是否適應)
5. 不要下任何配料, 必須要清喝, 但可以下少量鹽調味
6. 牛肉湯雪凍後會變肉凍, 會有很多白色浮點, 那是脂肪, 請去掉

空肚喝, 喝完感覺會有點飽, 這是正常的 ! 因為牛肉湯營養豐富, 容易吸收, 會減少想不停吃東西的意慾 !

如你有下列徵狀都可以試下:
1. 疲勞
2. 無力
3. 過量運動
4. 饞嘴
5. 傷風感冒
6. 情緒低落
只要你沒有什麼嚴重大病, 相信都不會有問題, 年紀也不拘. 如有長期病痛或大病, 請先問醫生意見. 但少量地試喝應該都沒有問題, 也可能對病情有幫助.

牛肉是眾多肉類最平性的, 而且動物蛋白質豐富. 人類體質必須有動物蛋白質, 才有足夠營養. 例如, 蚊子都要食血才能生存. 有些人說牛都是食草, 為何牛可以生存 ? 原來牛的巨大盲腸, 就是把植物蛋白質改成動物蛋白質的器官.

小火煲12小時, 可以把牛肉本身的毒素及可能有的化學物消毀, 餘下來的就是純蛋白質. 但此過程也會把牛肉的維生素消滅, 因此, 要另外補充大量水果及蔬菜.

要飲牛肉湯而不是牛扒的原因, 是因為腸胃可以吸收70-80%的牛肉湯水精華, 但只可以吸收最多30%的牛扒. 另外, 牛扒不只有肉毒素, 也可能有殘餘化學物. 因此, 吃牛扒未必有營養, 但可能會吃了毒素.

因為人類發展成只顧口舌之福, 只要好吃飽肚都放入口, 已經忘記了食物的營養價值. 如果我們有足夠營養, 就不會胡亂想吃東西, 或經常肚餓. 肚餓是身體營養不夠的訊號, 剛吃飯了但又肚餓, 不代表你吃不夠, 代表你吃的東西沒有營養, 或你無法吸收.

講多無謂, 試下最實際, 感覺上會多好多 Power 架　！

上海 - 母親出生地

(請先看 上海- 父親出生地 的文章)

母親及我父親也是在上海出生, 而且是同年 ! 母親的父親, 是日本神戶的第二代華僑, 原藉廣東省中山. 母親的母親, 是日本人. 在1920年代末, 因為美國蕭條, 日本經濟相當困難 ! 反而在上海, 正值繁榮 ! 我公公帶了我婆婆及大兒子, 走到上海謀生 ! 因此, 我母親就在上海出生了 !

當年日本人都集居於蘇洲河以北, 魯迅公園以南的虹口區. 聽聞我爺爺每天都從北面的江灣區, 經四川北路南下到外灘上班, 途中會經過虹口區. 他曾稱讚日本人社區整齊清潔 ! 而我母親的家, 聽聞就在四川北路及靶子路(今武進路)的十字路口 !
這是網上找到的20世紀初四川北路及靶子路十字路口, 但母親完全沒有印象 ! 因為, 她的父親竟然在母親兩歲時在上海因病過世, 享年只有31歲 ! 之後, 我婆婆便帶了我母親及舅父回日本神戶, 婆婆也從來沒有回過上海. 而我的爺爺, 應該每天都會經過此處 !

也聽我婆婆說曾背著我母親, 到一個在街尾盡頭的公園散步, 說她走了又走, 走了又走, 在公園內又被陌生人搭訕或什麼的. 我們都推算那就是魯迅公園. 據網上資料, 當時有很多日僑往魯迅公園散步 !

我們都浪漫地推想, 很有可能我母親在上海出生的兩年, 曾經跟我父親際身而過 ! 因為四川北路是我爺爺必經之路, 而江灣就在虹口的北面.

我母親沒有任何在上海的相片, 可能因上海是我婆婆傷心地, 她沒有刻意留下什麼. 也有可能相片在第二次大戰時丟失了 ! 下圖是我母親跟她哥哥在日本鄉間拍照 !

虹口區有日本租界之稱, 在十九世紀已有日本人聚居, 到三十年代已有數萬人 ! 他們多是由日本九洲長崎來謀生, 有些是跟大企業來, 有些是低下階層來找機會的 ! 他們都從日本海運大批物資, 把虹口建成跟在日本一樣 ! 在內居住的日本人, 甚至不覺得自己在海外, 覺得虹口是日本 !

到日軍爭霸的氣味日濃, 上海華人也開始敵視日本僑民, 相方開始不停生事 ! 日軍以保護日本僑民為名, 步步進迫, 把江灣區轟炸 ! 之後日軍勢力開始進入英法租界, 上海全面活在日軍刀口之下 !

到1945年日本投降, 住在虹口區的日本僑民全部遭強迫回國, 所有財物均被充公 ! 當中有很多在上海住了數代, 對中國人並無什麼恨意的日本人, 全部都身無分文地回國, 結束了虹口小日本時代, 也就是我母親出生的時空 !

上海 - 父親出生地

我父親在上海江灣區出生, 爺爺屬廣東移民. 相片中最左的小個兒是我父親, 最右是爺爺, 另有我嫲嫲. 其他是伯父, 姑媽, 細姑媽 !

此相片攝於1930年代, 是上海最繁盛之時. 當時江灣是一片片的農田, 我爺爺一家在那裡有大屋及大花園, 生活相當不錯. 下圖是我嫲嫲在屋子內外望.






江灣南面是現今魯迅公園, 再南面是虹口區. 虹口區由19世紀末開始已有相當多日本人居住. 到了20世紀, 西方各國在上海各施勢力, 日本也開始加入爭霸 ! 30年代末, 江灣區開始遭日軍滋擾, 父親說曾有多名日本兵持長軍刀入屋, 我爺爺非常膽大, 走出去跟他們交涉 ! 經過多番滋擾生事, 全球戰爭也開始蔓延, 波及上海 ! 當時有不少華人跟日英美法的僑民有生意來往, 情況跟現今的香港一樣, 相當華洋雜處 ! 因此上海是當時全球最 International 的地方 !





如此一個城市, 被西方日本相繼搶奪, 很多僑居於上海的西方人及日本人, 本來跟華人是生意伙伴, 並無深仇大恨 ! 但戰事挑起各族人的神經, 引致平民之間也衝突頻頻, 給外地政府更加多藉口, 以保護僑民入侵上海 !


江灣區受日軍轟炸, 全部變成廢墟, 我父親一家在這之前已逃入法租界的靜安區避難 ! 跟江灣農田不一樣, 上海市中心的房子都多是挨家挨戶的弄堂, 或叫弄里. 右圖就是我父親避難來的房子, 在靜安區膠州路的一個弄里內 ! 此房子現在仍有, 己裝上防盜窗花及分體式冷氣 ! 房子是三層高, 每層約600平方呎.

我父親一家六口當時跟其他親戚就迫在一起住了 !

雖然是避難, 但我父親在這裡也過了快樂的童年 ! 總是提著自己頑皮, 被爺爺打罵, 或夜歸要爬氣窗入屋, 相當攪笑 !